रोल्पा
२५-फागुन/ रोल्पाको त्रिवेणी गाउँपालिका-२ दहवनमा गए राति ट्याक्टर दुर्घटना हुँदा एक जनाको मृत्यु भएको छ भने सात जना घाइते भएका छन् । मृत्यु हुनेमा ट्र्याक्टरमा सवार मजदुर सल्यानको कुमाख गाउँपालिका-६ का ३२ वर्षीय टोपलाल विक रहेको जिल्ला प्रहरी कार्यालयका प्रहरी प्रवक्ता प्रकाश भुसालले जानकारी दिए ।
उनको राप्ती विज्ञान प्रतिष्ठान दाङमा उपचारका क्रममा मृत्यु भएको अस्पताललाई उद्धत गर्दै प्रहरीले बताएको छ । सडकमा काम गर्ने मजदुर सवार रा १ त १७२५ नम्बरको ट्याक्टर सडकबाट तल खसेको थियो । दुर्घटनामा परी घाइते सातै जनाको दाङस्थित राप्ती स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ ।
ट्याक्टर चालक दाङको घोराही उपमहानगरपालिका-३ का २९ वर्षीय नवीन चौधरीलाई प्रहरीले नियन्त्रणमा लिएको छ ।
