काठमाडौं,
२२-चैत/ आउँदो बैशाख ३० गते हुने स्थानीय तहको चुनाव बारे निर्वाचन आयोगले मंगलबार राजनीतिक दलहरुसँग छलफल गर्दै छ । बिहान साढे ११ बजे दलका प्रतिनिधिसँग छलफल गर्न लागेको आयोगले जनाएको छ । स्थानीय चुनावमा भाग लिने दललाई छलफलका लागि बोलाइएको आयोगका प्रवक्ता शालिग्राम शर्मा पौडेलले जानकारी दिए । छलफलमा चुनावको तयारी र आचारसंहिता बारे कुराकानी हुनेछ ।

आउँदो स्थानीय तहको चुनावमा सत्ता गठबन्धनले तालमेल गरेर अगाडि बढ्ने निर्णय गरेका छन् भने प्रमुख प्रतिपक्षी दल एमालेले पनि तालमेलको तयारी गरेको छ । एमालेले चुनावी तालमेलका लागि कमल थापा र राजेन्द्र लिङदेन नेतृत्वको दुवै राप्रपासँग संवाद अगाडि बढाएको छ । कतिपय वार्तामा अध्यक्ष केपी शर्मा ओली आफैँ सहभागी छन भने कतिपय वार्तामा उनी निकट नेतालाई खटाएका छन् । स्थानीय चुनावमा एक्लै लड्ने केन्द्रीय नीति भए पनि एमाले केन्द्रीय कमिटी बैठकले जिल्लामा भने तालमेल गर्न सकिने स्पष्ट पारिसकेको छ । यसैबीच, स्थानीय तहको चुनावमा तालमेलमा जाने नीतिगत निर्णय लिएको पाँचदलीय गठबन्धनले आजदेखि तालमेलको मापदण्डबारे छलफल गर्दैछ ।

मापदण्ड बनाउने बारे छलफल गर्न बिहान ९ बजे सत्ता गठबन्धनको बैठक बस्दैछ । बैठकमा स्थानीयस्तरबाट आएका रिपोर्टिङमाथि प्रारम्भिक छलफल हुनेछ । सत्ता गठबन्धनमा रहेका दल र एमाले तथा अन्य प्रतिस्पर्धी पार्टीले गएको स्थानीय तह चुनावमा प्राप्त गरेको मतको अवस्था, वर्तमान सांगठनिक स्थिति आदिबारे तथ्यांक विश्लेषण गरी प्रतिवेदन बनाउने गठबन्धनको तयारी छ ।

प्रतिकृया

प्रतिकृया